رحلــــــــــة إلـــــى دار المسنيــــن =]

بعد غياب .. ردينا =]

الاسبوعين اللي طافوا كنا نستعد لهذا اليوم .. هاليوم كان غير عن اللي قدموه we care .. بما انه طموحنا نهتم بكل فئات المجتمع .. هاليوم كان رحلة الى دار المسنين ..رايحين نقابل 18 مسنه فقط .. اهم اللي حالاتهم النفسيه والمرضيه تسمح لهم يقابلون الناس ويسولفون .. الباجي مو اجتماعيين او المرض يمنعهم.

اجتمعنا في نقطة التجمع و بدينا نتأكد من اغراضنا

وانطلقنا من نقطة التجمع...

طبعا الجاي والقهوه كان لهم دور فعّال بهالرحله =]

بهالوقت وصلنا من نقطة التجمع الى دار المسنين

دخلنا دار المسنين ..

للأسف كان أول منظر عند الباب واحد سفط حتى مانزل من سيارته قط ابوه ومشى لا سلام ولا كلام .. احنا ندري الاغلب متخلين عنهم اهلهم بس ماتوقعنا ننصدم ونوقف نطالع هالموقف بصمت !

<<*ملاحظه: كان في تشدديد على التصوير .. مسموح بس بشرط (الوجه) غير مسموح تصويره, بس من ظهرهم , فـ ماحبيت اصور وايد.>>

اهني دخلنا وسلمنا عليهم و وزعنا الهدايا والورد..

عقب قعدنا وياهم نسولف ونصب لهم جاي وقهوه ..
ماخش عنكم قلبي عورني وكنت احاول امسك روحي كثر ماقدر.. وايد من القروب يطلعون بره ويردون يدشون بس عشان مايبين عليهم الحزن.. ما ننلام والله..
قعدت ويانا وحده كنا نسولف سوالف عاديه ونضحك وياهم مانبي نعرف منو يابهم والا شحقه وليش نبيهم ينسون.. هالمواضيع ماتستاهل تنفتح علشان ما نضيق خلقهم ويضيق خلقنا.. بدون مايتكلمون و خنقتنا العبره شلون لو تكلموا!؟
قعدنا مع وحده نسألها مرتاحه مستانسه وشسمج .. سوالف عاديه بنص الحجي قالت انا اخواني ماشوفهم كلش وخواتي مايزوروني بس ساعات يزوروني الخميس وكله يقولون لي بناخذج وويروحون ويخلوني وغطت روحها بالملفع و قامت تبجـي... انا عن نفسي قمت ماقدرت .. موقف صج يحس الواحد مو بس يأثر ييجرح يخليك تحلف مليون مره لو شنو ماكانوا امك وابوك جاسيين ماتقطهم هالقطه .. تحس بنعمه ما فكرت تحس فيها من قبل...
وحده نعطيها ورد تقولنا انتو الورد والله يخليكم لشبابكم وبحفظكم و و و .. دعاوي تفرح القلب وبنفس الوقت ينكسر فلبك عليهم .. نادتني وحده وقالت قعدي يمي وتسألني شسمج ومن وين انتو وسوالف و جنها تعرفني من زمان وايد وايد حسيتها تبي احد اتكلمه يكلمه يزورها تحس انه لها اهل ..
طول الوقت يدعون لنا اي وبعد يغنون ويضحكون ومستانسين حمدلله ..
يت حزة الروحه وانا اسلم على اللي نادتني قتلها استانستي؟ قالت وايد قتلها تبين نزورج بعد؟ قالت تعالوا كل يوم ابيكم اتزوروني احبكم انا! ...شوفوا شلون قلوبهم بيضه وصافيه ويحبون اي احد يحسون انه اهتم فيهم حتى لو ساعه...

بهالوقت طلعنا .. وانتهت الرحلـه .. بس اكيد في غيرها =]
-----------------------------------------------------

مادري شقول وشـ خلي .. ياليت الكل يحافظ على امه و ابوه شنو ما سووا .. ترى ما تحس بالنعمه الا لما تفقدها ..

بالنهايه احنا علينا نسوي الصـح و الله بيحاسب الكل..
========================================================

أعضاء الرحله:

-عنود الشمري

-بشاير الكعبي

-أسرار الحربي

-حنان العلي

-مريم الفيلكاوي

-شيماء الخميس

-بدور العتيبي

-عنود العجمي

-آلاء العطار

-أسماء الفيلكاوي

Third Party ,, الحفلـه الثـالثـه

المكان: مستشفـى الـNBK

التاريخ: 14.1.2008

الوقت: 10:00 am

ينطرونا =]

إنجهز =]

نوزع تفافيخ على ما نبدي =]

بدينا =]

الصبي اللي يلعب بنص الصوره اسم الله عليه شييطوون بس شحلات سوالفه و كان ياخذ تفافيخ ويطيرهم وكل مره نقوله نعطيك بس ما اتطيرهم يقول لالالالالالالا ما اطيرهم ويطيرهم =] كلنا نحبه والله الله يشفيه يارب ويشفيهم كلهم

+

اهني موظفين الknpc يعطون الاطفال الهدايا




هذي اللوحه من أول حفله سوينا بمستشفى البنك الوطني ايدين الاطفال و اهلهم وممرضين واحنا .. معلقينها على الطوفه يم الplay room =]

----------------------------------------------------

أخيـرا كتبت بوست الحفله الثالثه =]
والله ودي من زمان اكتبه بس الحين فترة مدتيرمات وماكو وقت =S
المهـم ..

بسـم الله الرحمن الرحيـم

هذي ثالث حفله نقدر نقول غير من ناحية المشاركه , كانت مو بس من قروبنا
هالحفله تمت تحت رعاية الـknpc شركة الكويت الوطنية للبترول
وصل خبر للعلاقات العامه عن قروبنا فـ حبت الـknpc تقابلنا وتستفسر اكثر عن طبيعة العمل و منو احنا , والله رحنا وقعدنا مع شخص من العلاقات العامه (أهم شي شخص ! توهقت ! اسمحولي والله انا ماثبت ماعرف المسميات وجذي مادري تيم ليدر مادري مانجر شي من هذا القبيل =]) المهههم .. و تكلمنا عنا وعن بدايتنا وطبيعة عملنا و راويناه صور من اللي سويناه قبل وشرحناله كل شي .. استانس وايد وحب يسوي حفله عن طريقنا , واختاروا اطفال السرطان , عشان جذي سوينا بالـNBK مره ثانيه , بما انهم بيرعون هالحفله وفروا لنا الهدايا و جم لعبه حطيناهم بالمدخل مال المستشفى يلعبون فيهم الأطفال و كـ ذكرى منا ومن البترول , بمـا انه احنا نعرف عدد الأطفال والحالات تقريبا , احنا رحنا لمحلات يتعاملون معاها البترول ونقينا الالعاب المناسبه و وفروها لنا , واحب اذكر انه اول حفله بالNBK كانت 100 طفل بس منهم داخل المستشفى على طول ومنهم يروح ويرد , وهذي الثانيه 150 طفل , وقبل كل حفله نوزع اعلانات بالمستشفى علشان محد ينسى , فـ كانت كمية الهدايا كبييير والبالونات والاغراض مالت الكورنرات (طبعا هذي علينا) يعني المجهود صار دبل الحفله اللي قبل , من الاشياء المهمه انه واحنا نحط الاعلان بالمستشفى نمر المرضى و نسلم ونسألهم شنو يحبون شنو يبون وشنو ودهم فيه منها نحدد نوعية الألعاب اللي ناخذهم , ونوصل الأمانه لـ صاحبها =]
اهني صار موقف فعلا هزنا وأثر فينا لدرجه ما قدرنا نمسك دموعنا !
الحفله كانت تصدف يوم أثنين , وفي مريضه عمرها جنه 12 او 11 سنه كانت تقولنا المسؤوله عنهم انه حالتها وايد
صعبه وممكن انها تتوفى باي لحظه , بس هذا محد يحدده كله بيد الله , فـ هالمريضه قالت لنا انا ودي بـ ice cream maker قلنالها تم ! قالت انا مابي آخذه انا ابي اعطيه أمي ذكـر مني علشان تذكرني دايما , أكيد قلنالها لا بتاخذينه وتعطينه امج وتطلعين بالسلامه انشالله , هالحجي قبل الحفله باسبوع تقريبا , الصدمه ! يوم الجمعه قبل الحفله بيومين دقت علي رفيجتي من القروب , رديت عليها وحسيت انه في شي من نبرة صوتها , فـ قالت لي إنه هالبنت توفت , والله كل ماذكر هالموقف دموعي تنزل و ماراح انساه طول عمري وعلى طول على بالي , وجنه البنت كانت حاسه انها بتروح فـ بتخلي شي منها حق امها سبحان الله مادري شلون هالموقف ماعرف اعبر شنو حسيت حزتها بس ماقدرنا نمسك دموعنا كلنا ... و وصلت الأمانه حق أمها ...
الله يرحمها ويغفر لها يارب

وصل يوم الحفله ورحنا وكلنا بالطريج نفكر بالموقف اللي صار وانه البنت مفروض معانا اليوم ومو قادرين نوقف تفكير بس شدينا روحنا ودشينا , والحمدلله الأطفال عارفينا ويسلمون ويسألونه وينكم طولتوا , وقاعدين ينطرونه =] , رتبنا كل شي وبدينا , والتفاعل وايد حلو , والـKNPC ما قصروا حضروا واستانسوا وشكرونا , ويعطيهم العافيه دعونا للشركه و قابلونا و كتبوا عنا بمجلتهم وكرمونا , وكانوا وايد ساندينا وماننسى لهم هالوقفه الطيبه , جزاهم الله ألـف خيـر كلهم موظف موظف =] , تعامل حلو و عطونا ثقه وقالولنا يالله احنا وياكم , يعطيهم ألف عافيه على وقفتهم وثقتهم فينا , والحمدلله عجبهم اللي سويناه واشكرهم مره ثانيه
وانشالله ما تكون آخر مشاركه =]

Second Party .. الحفلـه الثانيـه

المكـان: مستشفـى إبن سيـنا



التاريخ: 2.12.2007



الوقت: 11:00 am

هـذي ثـاني حفلـه
كانت في مستشفى إبن سينا لـ أطفال الجراحه و العمليـات
طبعا إتفقنا مع المستشفى وحددنا الوقت والتاريخ عن طريق

KAACH

و التطبيق علينا
إهنـي انا مابـي أنسـى شخص كان له دور كبيـــــــــــــــــــر في هالحفلـه بالذات ,البدايـه كـانت بحفلتنا الأولـى في الـNBK بعد ما خلصـت الحفله نادانا شخص له طفليـن مريضين سرطـان وقعـد بالحفله كلها , المفاجأه‍‍!! انه عطانا مبلغ تبرع فيه وحط بيدنـا طبعا احنا ما نمسك تبرعات ولا نجمع تبرعات من أحد (التمويل كان كله منه إحنا والأهـل) لاننا مو جهه والا جمعية زكاة , و سالفة تبرعات يبيلها إذن من الشؤوون وما إلى ذلك ,فـ احنا مجرد عمل خيري هدفه نشر التوعيه و كله بالنهايه لوجـه الله , فـ قلنا له لـو تعطيه مسؤولة المستشفى أحسن ,قال انا بدعمكم أنتو ومستعد أرعاكم واساعدكم وابيكم اتسوون في اكثر من مكان , كان هذا تشجيع علشان نكمل وفعلا كملنا وسوينا في إبن سينا بـ بالمبلغ كلـــه وساهمنـا احنا بعد , صج إنه المكان اللي عطونا اياه في إبن سينا مو كبير ولو تلاحظون ماكو صور وايد نفس الNBK كان ضيج بس هذا ما منع انه نكمل لي الآخر , هم كان تفاعل الاطفال حلووووووووووو جداً ويفرّح القلب والله , مع انه بعضهم لابسين الروب الابيض مال العمليات يعني بيدش عمليته بس كانوا مشاركين ومستانسين , فـ قالت لنـا سستـر ( ممرضـه) أول مره أشوف طفل يدش غرفـة العمليـات مستانس!, وهذا اللي احنا نبيه , حتى هالطفـل مر صوبنا ويدزونه على سريـر العمليـات ويسويلنـا باااي بإيـده وكان يضحـك من قلبـه , والله شعور حلو ما ينوصف إنك اتسوي شي بسيط وتلقى المردود ماله أكبـــــــــــر من ما تتوقع
من المواقف اللي صارت.. كان في واحد ومرته (زوجته) عندهم ولد عمره 5 أو 6 سنين على كرسي متحرك هالطفـل هذا تفاعل ويانا حيييل واستانس وكل شوي يصور ويلون و يغني , اللي أثر فينا وايد إنه امه قاعده وتطالعه شلون مستانس وتبجي وأبوه كان صج خانقته العبره , الصبي من صارله الحادث ما شافوا مستانس نفس هاليوم .. كانت لحظـه تأثر بالحجــر! , وشكثر شكرونا و دعولنا , كلمة يعطيكم العافيه بس تكفي أو حتى مو كلمة شوفتهم بهالموقف ويطالعون ولدهم تكفينـــا , حتى لو دمعوا من داخلهم وايد فرحانين
"للأسف".. كان في وايد أطفال ضحايا حوادث سيارات, ياليت الكـل قبل ما يتهور بسيـارته أو يفكر يسـرع و يقحص ومادري شنو من هالخبال .. يفكر بالناس إذا اهو بايعه عمره ومستغني عن نفسه ترى الناس مو مستغنيه لا عن نفسهم و لا عن عيالهم , لا يصير الواحد أنانـي مايشوف بالشارع إلا نفسه وسيارته ,, ترى الشارع للكـل في مليـون غيره

اللــه يهـدي ويشـفي الكــل
آمـيـــــــــــــــــــــــــــــــــــــــــــــــــــــــــن

First Party .. الحفـله الأولـى

المكـان مستشفـى الـ NBK (البنـك الوطنـي) لأطفــال الســرطــان

هالحفـله كانـت أول خطـوه بدينـا فيـها ..
اتفقنا مع المستشفى وحددنا الوقت واليوم .. وبلغوا المرضى وأهاليهم وبدينا بتحدييد الانشطه اللي بنقدمها للأطفال,
طبعـاً الأنشـطه اللي كانت بالحفله, كل عضوه بالجروب شاركت فيها , توزعت الأنشطـه بينـا
فـ كتابة الأسمـاء اللي مبينه بالصوره أحد الأنشطه , والـface paint (الرسم على الوجوه), التصويـر الفوري مع Barney" ما اخترنا بارني الا بعد ما تأكدنا من المسؤوله عن الاطفال المرضى انهم يحبون هالشخصيه جدا" بالإضافه لأغاني بارني, الـ Finger paint (اللوحه الموجوده بالصوره اهي الفنجر بينت , الاطفال يحطون ايدهم بالألوان وبعدين يبدون بالطبع على اللوحه) , والهدايا والالعاب والتلوين على الفخار وبالكراسات .. يعني حاولنا كثر ما نقدر انوفر أغلــب الأنشطه والألعاب اللي تلفت انتباه الطفل وتجذبه لنـا, لأنه قبل كل شي علشان يتقبلنا الطفل ويتفاعل معانا لازم نلفت انتباهه بـشي اهو يحبــه ويدوّر عنـه في جو المستشفى الممل !
كنـا حابين نمسك كل شي احنا ونحتك مع الاطفال أكثر ونصيرلهم أهـل وأصدقاء, فـ كل شي حتى الأغاني ما استعنا بأحد يشغلهم كنت انا الـ DJ =) .. يعنـي جو التعاون اللي كان بالجروب الحمدلله شي فعلاً ما يتصوره الواحد ,,
واللي أهم من كل شي ردت فعل الأطفال !!
أول حفله ! وداشين على أطفال سرطان يعني حالتهم صعبه وبعضهم مايقدر يطلع من غرفته واللي يطلع يكون معاه جهاز او مغذي !
وأول مره يشوفونا ! أكيد بيقولون منو !! وشنو !! وليش !! ومتى !!
دخلنا المستشفى كانوا قاعدين بالكراسي ينطرون بس ماكانوا وايد ! و كاشين شوي مايدرون شنو راح يصير او شلون بتكون الحفله !
حمدلله كنا مرتاحين ودشينا نبتسم لهم وبدينا نييب طاولاتنا و نحط اغراضنا و كورنراتنا , ومعانا بارنــي (مسكين اخو وحده من الجروب تطوع يلبسه ماكان يدري انه بيموت داخل اللبس =] ما عليه عمل خيــــــــري )!
المهم , بدينا ودش بارني واغاني شوي شوي زادوا شوي شوي اللي ما نزلوا طلعوا يطلون من فوق @@ !!
بعدين ما نشوف الا الأطفال كلهـــم متوزعين ويلونون ويرسمون ومستااانسييين وحتى بعضهم يطلبوني أغاني !! يعني شخبط شخابيط والا اغنيه من أغاني بارني ويسولفون معانا جنهم يعرفونا من زمان !
صراحه احنا من داخل كنا خايفين لانه اول مره ومرضى واطفال في احتمال كبير ما يتقبلونّا ,, لكـن ردت فعلهم فعلا شي ما تخيلناه و قعدوا معانا لاخر شي حتى واحنا نشيل اغراضنا بنروح اللي يقول لا تروحون واللي متى تردون ونبي مره ثانيه واللي صور معانا ,, ابدا ماكنا متوقعين هالاستقبال الحلوووو اللي من داخل الواحد يحس بفرح مو طبيعي يحس انه سوه شي قدر يكسر خوف هالاطفال او انطوائيتهم بسبة المرض, او حتى يحسسهم انهم طبيعين يقدرون يلعبون ويلونون ويستانسون مثلهم مثل غيرهم حياتهم مو مقتصره على مستشفى وادويه !
حتـى حزتها كان رمضان وكلنا صايمين وحتى اهلهم , فـ ما كنا متوقعين هالتفاعل الكبير,, وبنهاية الحفله يت اختصاصية حياة اطفال اهي مسؤوله عن الاطفال وقالت لنا : انتو سويتوا اللي غيركم ما قدر يسويه انا منصدمه شلون اليهال حبوكم وتفاعلوا معاكم جذي لأني ماكنت متوقعه هالتفاعل أبداً
وشكرتنا وايد .. بس بالعكس احنا اللي شكرناها لانه كلامها شهاده ماراح ننساها طول عمرنا شي كبير بـأول خطوه لك بـعمل جديد تسمع هالكلام ! ,, كلامها واللي شفناه من الاطفال وتفاعلهم كان دافع قـــــــــــــــــوي انه نستمر ونكمل , ونذكر الناس كلهم اني في جزء من مجتمعنا موجود جدامنا انتو ناسينه , لازم نتغير لازم نلتفت حق غيرنا , اهو بالنهايه طفل ! شايل مرض أكبر منه ! يمكن احنا اذا صارلنا صداع نتعب ومانقوم من الفراش .. الخ !,, لكن اهو عمره 5 سنين او حتى شهور قليله وفيه سـرطان , هذا مكتوب له لكن مو معناته مكتوب له نخليه ونمشي , شكثر في حالات اهلهم حاطينهم بالمستشفى ومخلينهم يطلون بالسنه مره ! على اساس انه يقولون والله انا ولدي مافيه امل يعيش و خلاص شحقه اخذه ؟!

هذا منطق ؟! هذا كلام عاقل !؟ ,, كلنا بنموت وكله بيد الله يمكن احنا انموت قبله !
لكن الهدف الرئيسي التواصـل النفسي مع الطفل انه يحس بجـو الاهل والعايله والناس يمه ومهتمه , الحفله مو بس اني اشوفه يلون ويضحك ونمشي .. لا الحفله مجرد طريقه لجذب انتباهه عشان يعرفنا ..
لو بعرف نفسي على شخص عمره 30 بصافحه واقوله اسمي , لكن لو بعرف نفسي على طفل هم بصافحه واقوله اسمي وامشي !؟ .. اصافحه بس (بطريقته) واقوله اسمي هم (بطريقته) لازم انزل لمستوى عمره وتفكيره .. فـ الحفله عباره عن مصافحه بينا وبين الطفل بعدين نقول اسمنا احنا WE CARE ,, جذي صار يعرفنا !
بعد هالحفله عرفنا اطفال وايد وسألنا عن حالاتهم وكنا نزورهم بايام الاسبوع نسلم ونقعد ونسأل عن حالتهم ,, حتى تعلقنا في بعـض الاطفال ,, خفت دمهم ابتسامتهم طريقة التعبير كل شي فيهم يخلي الواحد يحبهم اكثر ..

عســـــــى اللــــــــــــه يشفيــــــــــــــهم
آميــــــــــــــــــــــــــــــــــــــــــــــــــــــن

من هنــــــا

من هنا ..
من اليوم ..

بدأت رحلة WE CARE GROUP الألكترونية!

بالبدايه راح اتكلم عن قروبي وأعرف فيه , عشان تكون الصوره واضحه للكل :)

بسم الله ..

•بدأت الفكره في شهر 9 من عام 2007.
•الفكـره هي: التطوع بإقامة حفلات وأنشطه للأطفال المرضى في المستشفيات, أو اي حالات صعبه تحتاج مزيد من الإهتمام والرعاية.
•طُرحت الفكره على جميع الأعضاء, مع اقتراح اسم .We Care Group
•تم قبول الفكره بصدر رحب و تأييد قوي لتطبيقها.

•بعد ذلك بدأنا البحث عن جهه مختصه في المجال التطوعي لنبدأ منها رحلة التطوع.
•خلال البحث عن جهه قرأنا عن بيت عبدالله وهو مشروع ســـيتم انشاءه و المسؤوله عنه هي (KAACH) الجمعية الكويتيه لرعاية الأطفال في المستشفيات.
•اتجهنا للجمعية للتعرف على انشطتها حيث انها تهتم بالأطفال المرضى في 6 مستشفيات في الكويت(الرازي/ الأميري/ ابن سينا/ مستشفى البنك الوطني/الفروانيه/ الجهراء).
•للمزيد عن KAACH يرجى زيارة: http://www.kacch.org

•تم التعاون بين We Care Group و KAACH التي هي حلقة الوصل بين We Care والأطفال .
•تتواصل الجمعيه مع المستشفى الذي يتم اختياره, لتحديد التاريخ والوقت المناسب للأطفال وعوائلهم لإقامة الحفله.

هذي فكره بسيطه وعامه عن القروب وطريقة تأسيسه
والهدف من هذا كله نشيل ولو جزء بسيط من معاناة المرضى
يمكن احنا ما نشكي من شي بس اهم يشكون من كل شي !
ولو شكينا صدقوني مو مثلهم
عمره سنه ولا 5 سنين اللي بعمره وين؟
يلعب, يتمشى, بالروضه, مع اهله
واهوه وين؟ شايل مرض اكبر منه, مانعترض مكتوب له ,وأجر له
بس
ليش ما نشيلهم ونسندهم؟!, في منهم محد يسأل عنهم ولا يدرون عنهم!!

لكن WE CARE GROUP باذن الله .. راح يغير كل شي ! :)